நீங்கள் தேடியது "சப் இன்ஸ்பெக்டர்"

திருத்துறைப்பூண்டி:

திருவாரூர் மாவட்டம் திருத்துறைப்பூண்டி அருகே தலைக்காடு சாலைக்கடை பகுதியில் சில இளைஞர்கள், கடந்த 5-ந் தேதி அந்த வழியாக மோட்டார் சைக்கிளில் சென்றவர்களை தாக்கி தகராறு செய்தனர்.

அப்போது பா.ஜனதா முன்னாள் மாவட்ட பொதுச்செயலாளர் கணேசன் மகன் பிரகாஷ் (24) மோட்டார் சைக்கிளில் வந்தார். அவர் வந்த வாகனத்தையும் அந்த கும்பல் அடித்து நொறுக்கியது.

இதுகுறித்து தகவல் அறிந்து திருத்துறைப்பூண்டி சப்-இன்ஸ்பெக்டர் பாலசுப்பிரமணியன் மற்றும் போலீசார், சம்பவ இடத்துக்கு சென்று தகராறில் ஈடுபட்ட தலைக்காடு பகுதியை சேர்ந்த சுபாஷ் சந்திரபோஸ் (24) என்பவரை கைது செய்தனர். அவரை ஒரு மோட்டார் சைக்கிளில் அழைத்து சென்றனர். உடன் மற்றொரு சப்- இன்ஸ்பெக்டர் சிவகுமார் சென்றார்.

அப்போது அங்கு வந்த பா.ஜனதா முன்னாள் மாவட்ட செயலாளர் கணேசன், போலீசார் சென்ற மோட்டார் சைக்கிளை வழிமறித்து தடுத்து நிறுத்தினார். தன் மகனை தாக்கிய சுபாஷ் சந்திர போசை அரிவாளால் வெட்ட முயன்றார்.

இதை சப்-இன்ஸ்பெக்டர் சிவகுமார் தடுக்க முயன்ற போது அவரது வலது கையில் அரிவாள் வெட்டு விழுந்தது. இதில் படுகாயம் அடைந்த அவரை சிகிச்சைக்காக திருவாரூர் அரசு ஆஸ்பத்திரியில் சேர்த்தனர். அங்கு அவருக்கு தொடர்ந்து சிகிச்சை அளிக்கப்பட்டு வருகிறது.

இதுபற்றி திருத்துறைப்பூண்டி போலீசார் வழக்கு பதிவு செய்து பா.ஜனதா பிரமுகர் கணேசனை கைது செய்தனர்.

உசிலம்பட்டி:

மதுரை மாவட்டம், திருமங்கலம் அருகே உள்ள கக்கன் காலனியைச் சேர்ந்தவர் மாயன் (வயது 55). இவர், சேடப்பட்டி போலீஸ் நிலையத்தில் சிறப்பு சப்-இன்ஸ்பெக்டராக பணியாற்றி வருகிறார். நேற்று இரவு இவர் பணியில் இருந்தபோது காவல் கட்டுப்பாட்டு அறையில் இருந்து ஒரு தகவல் வந்துள்ளது.

அதன் அடிப்படையில் ஏட்டு ஆனந்தனுடன் சப்-இன்ஸ்பெக்டர் மாயன் ரோந்து பணிக்குச் சென்றார். இன்று அதிகாலை 3 மணியளவில் அவர்கள் சின்னக்கட்டளை பகுதியில் சென்றனர்.

அப்போது அங்கு 2 பேர் போர்வையால் உடலை மூடியபடி நிற்பதை பார்த்து விசாரித்தனர். அவர்கள் 2 பேரும் முன்னுக்கு பின் முரணாக பேசினர். இதனால் 2 பேரையும் தனித்தனியாக சப்-இன்ஸ்பெக்டர் மாயன் விசாரித்தார்.

அந்த நேரத்தில் ஒருவன் திடீரென மாயனின் கழுத்தில் கத்தியால் குத்தினான். இதில் அவர் நிலைகுலைந்த நேரத்தில் 2 பேரும் தப்பி ஓடிவிட்டனர்.

கத்திக்குத்தில் காயமடைந்த சப்-இன்ஸ்பெக்டர் மாயன், உசிலம்பட்டி அரசு ஆஸ்பத்திரியில் அனுமதிக்கப்பட்டுள்ளார். ரோந்து சென்ற சப்-இன்ஸ்பெக்டர் கத்தியால் குத்தப்பட்ட சம்பவம் மதுரையில் பரபரப்பை ஏற்படுத்தியது.

அவரை கத்தியால் குத்தி விட்டு தப்பி ஓடிய 2 பேரை போலீசார் தேடி வருகின்றனர்.

சாத்தூர்:

சாத்தூரை அடுத்த படந்தால் அருகே தென்றல் நகரில் வசித்து வரும் பழனிசாமி என்பவரது மகன் கண்ணன்(வயது39). இவர் ரெயில்வேயில் சப்-இன்ஸ்பெக்டர் என்று கூறி சாத்தூரில் நிதி நிறுவனம் நடத்தி அதிக வட்டிக்கு பணம் கொடுத்து வந்துள்ளார்.

இதனை அறிந்த படந்தால் கிராம நிர்வாக அதிகாரி கொடுத்த தகவலின் பேரில் சாத்தூர் டவுன் போலீசார் விசாரணை மேற்கொண்டனர். அதில் கண்ணன் கரூர் மாவட்டம் பசுபதிபாளையத்தை சேர்ந்தவர் என்றும் நிதிநிறுவனத்தில் பணம் பெற்றவர்கள் ஏமாற்றிவிடாமல் இருக்க சப்-இன்ஸ்பெக்டர் என கூறியதாகவும் விசாரணையில் தெரிய வந்தது.

இதனைத்தொடர்ந்து அவர் வசித்து வந்த வீட்டை சோதனையிட்டதில் ரெயில்வே காவலர் உடை மற்றும் அவரது மோட்டார் சைக்கிளில் கண்ணன் ஆர்.பி.எப். என்று எழுதி இருந்ததும் தெரிய வந்தது. காவலர் உடையையும் மோட்டார் சைக்கிளையும் பறிமுதல் செய்த போலீசார், கண்ணனையும் கைது செய்தனர். அவரை சாத்தூர் கோர்ட்டில் ஆஜர்படுத்தி மதுரை மத்திய சிறையில் அடைத்தனர்.